پەیوەندی bergeh.com@gmail.com

ده‌ما کرن و گۆتن ژ هه‌ڤ دوور بن سیاسه‌ت دله‌وته‌

ده‌ما کرن و گۆتن ژ هه‌ڤ دوور بن سیاسه‌ت دله‌وته‌

ل ترکیێ و باکورێ کوردستانێ سیاسه‌ت ب ئاوایه‌ک جودا تێ کرن، کێم زێده‌ هه‌موو پارتی و ئالیێن سیاسی ب یه‌ک مه‌تۆد سیاسه‌تا خوه‌ ڕێڤه‌ دبن. ئەگەر د ستراته‌ژیا خوه‌ یا سیاسی دا، ئارماجێن جودا بدن خوویاکرن ژی لێ د بنگه‌هێ دا یه‌که‌ و وه‌ک هه‌ڤه‌.

پارتیێن ترکان هه‌موو ل گۆر ئیدیۆلۆژیه‌ک تایبه‌ت سیاسه‌تێ ڕێڤه‌ دبن. هه‌ر ئالیه‌ک ل گۆرا خوه‌ ده‌مۆکراسیێ دنرخینه‌، ده‌مۆکراسیا هه‌ر ئالیه‌کی جودایه‌، عه‌داله‌تا هه‌ر ئالیه‌کی ب سه‌رێ خوه‌یه‌ چ جارا سیاسه‌ت نه‌ ژ بۆ گه‌ل یان ژی ژ بۆ به‌رژه‌وه‌ندیێن گشتی یێن جڤاتێ تێ کرن. سیاسه‌تێ د بنگه‌هێ خوه‌ دا ژ بۆ به‌رژه‌وه‌ندیێن خوه‌ و پارتیا خوه‌ دئافرینن.

وه‌ک میناک، ل ترکیێ پارتیێن ترکا ، ڕه‌وشه‌نبیر، نڤیسکار و ئاقلمه‌ندێن وان خوه‌دی دیتنێن جودانه‌، هه‌ر ئالیه‌ک ل گۆرا خوه‌ خوه‌دیێ ئیدیۆلۆژییه‌کێ یه‌، لێ ده‌ما پرسا کورد تێ هۆلێ هه‌موو دبن یه‌ک ده‌نگ. ژ بۆ وان د ڤێ ده‌ربارێ ده‌ ئیدیۆلۆژی، فکر، دیتن تشته‌ک نامینه‌. چه‌پێن وان ، کۆمونیستێن وان، فاشیست و نژادپه‌ره‌ستێن وان ده‌ما پرسا کورد تێ ڕۆژه‌ڤێ وه‌ک هه‌ڤ دئاخڤن و پشگریا هه‌ڤ دکن.

د پرسگرێکا سوریێ دا سیاسه‌تا حوکومه‌تێ و موخاله‌فه‌تێ جودا یه‌. ده‌ستهلاتا ئاکەپێ و ئه‌ردۆگان ب توندی شه‌رێ ڕژێما سوریێ و بەشار ئه‌سەد کرن و دکن، پشتگریا هێزێن ئۆپۆزسیۆنا سوریێ کرن و دكن. لێ پارتیێن ئۆپۆزسیۆنێ، جەهەپە، ڤاتان پارتی و پارتیێن دن ڤه‌کری پشتگریا ڕژێما ئه‌ساد کرن و دکن، سیاسه‌تا حوکومه‌تا یا ل دژێ ڕژێما سوریی ڕه‌خنه‌ کرن ل دژێ ئاریکاریا ئۆپۆزسیۆنێ سه‌کنین. لێ ده‌ما به‌حسا کوردێن ڕۆژاڤایێ کوردستانێ هات کرن، ده‌ما ئێریشێ عه‌فرینێ کرن هه‌موو ب هه‌ڤره‌ بوون یه‌ک، ب یه‌ک زمانی ئاخڤین.

ژ ترکیێ هه‌موو ئالیێن سیاسی ژ بۆ پشتگریا ئارتێشا کو ئێریشێ عه‌فرنێ بکن ڕۆژانه‌ سه‌ردانا ده‌ڤه‌رێن سەر سنۆر کرن، بێ ئیستیسنا هه‌ر ئالیه‌ک سیاسی ئه‌ڤ یه‌ک کر. ئانكو بنگه‌هێ یه‌کێتیا ئالیێن ترک ل سه‌ر دژاتیا کوردا هاتیه‌ ئاڤاکرن.

ژ ئالیه‌ک دن هه‌ر ئالیه‌ك هه‌ول دده‌ کو جڤاتێ بێخه‌ د خزمه‌تا سیاسه‌تا خوه‌ دا، که‌سه‌ک سیاسه‌تا خوه‌ نایێخه‌ د خزمه‌تا جڤاتێ دا.

ل باکور پارتیا هه‌ری ب هێز هەدەپە یە، ھەدەپە ژی هه‌مان سیاسه‌تا ئالیێن ترک ب ڤه‌رسیۆنا کوردستانێ ڕێڤه‌ دبه‌. سیاسه‌تێ ژ بۆ خوه‌ و ژ بۆ به‌رژه‌وه‌ندیێن پارتیا خوه‌ دکن. ئه‌گه‌ر هه‌ر کورده‌ک ده‌ستێ خوه‌ ده‌ینە سه‌ر وژدانا خوه‌ دێ ببینە کو، شاره‌داریێن د ده‌ستێ هەدەپێ ده‌ چ خزمه‌ت هاتیه‌ کرن. هەدەپە ژ بۆ پارتیا خوه‌ و هه‌ڤالبه‌ندێن خوه‌ هه‌موو ده‌ستهلاتداریا خوه‌ یا شه‌ره‌داریا ب كارتینە. یانی تشتا شاره‌داره‌ک یێ باژاره‌ک ل ترکیێ دکه‌ ، هەدەپە ژی ل کوردستانێ دکه‌. به‌رژه‌وه‌ندیێن که‌سایه‌تی و یێ پارتیێ ئه‌ساسه‌.

ئالیه‌ک ده‌ما ئالیێ دژبه‌ر ڕه‌خنه‌ دکه‌ ب چ ئاوایی ڕاستیا خوه‌ نابینه‌. لێ هه‌مان تشتێ دکه‌.
ب کورتی ستوونێ سیاسه‌تێ ل ترکیه‌ و باکورێ کوردستانێ ئێدی نکاره‌ به‌رژه‌وه‌ندیێن که‌سایه‌تی ڕاگره‌. ڕۆژ ب ڕۆژ هه‌ر ئالیه‌ک هه‌ول دده‌ ڤان ستوونا ب هێز بکن، لێ هه‌ر به‌ر ب ڕووخاندنێ ڤه‌ دچه‌. ئه‌تیکا سیاسی واته‌یا خوه‌ ب ته‌مامی وندا کریه‌، هه‌ر ئالیه‌ک به‌حسا ئه‌خلاق دکه‌، لێ مخابن ئەو ئەخلاقێ ئەو بەحس دكن نینە، به‌حسا ده‌مۆکراتبوونێ دکن، لێ هه‌رکه‌س دیکتاتۆره‌کی د ناڤا خوه‌ ده‌ خودان دکه‌. به‌حسا به‌رژه‌وه‌ندیێن گه‌لێری دکن ، لێ ژێ دوورن. د سیاسه‌تا ترکیێ و باکورێ کوردستانێ دا ، گۆتن و کرن ژ هه‌ڤ دوورن.

پارتیێن کوردی دڤێ د په‌نجه‌ره‌یا کوردستانی را ئالیێن سیاسی ل ترکیێ بنرخینن. دڤێ پیڤان ده‌ستخستنا مافێن ڕه‌وا یێن کوردا بن. وه‌ک دن چ سیاسه‌تا بێ کرن دکه‌ڤه‌ د بن خزمه‌تا ترکیێ و که‌سایه‌تێن که‌یسپه‌ره‌ست دا.

2019.04.17
دارا بیله‌ک