پەیوەندی bergeh.com@gmail.com

دێرسم ل كوردستانێ یە لێ نە كوردستانی یە

دێرسم ل كوردستانێ یە لێ نە كوردستانی یە

ل دێرسمێ هلبژارتنێن شه‌ره‌داریێ كو د 31.03.2019ێ ل تركیێ و باكورێ كوردستانێ ھاتن ئەنجام دان، خوه‌دی نرخه‌کی گه‌له‌ک تایبه‌ت بوون. دێرسم باژاره‌ک ل کوردستانێ یه‌، خه‌لکێ ل دێرسمێ دژین کوردن و پرانیا وان وه‌ک مه‌زهه‌بی عەله‌وی نه‌. دێرسم باژاره‌ک ل کوردستانێ یه‌ لێ مخابن دێرسم نه‌ کوردستانی یه‌. د ڤێ ته‌سبیتێ دا ده‌ما هلبژارتنێن هه‌رێمی ل دێرسمێ بێنه‌ نرخاندن، پرسا کورد ژ بۆ کورده‌کی گه‌له‌کی گرینگه‌. ژ به‌ر کو ڕه‌وشا سیاسی ل دێرسمێ ژ کوردبوونێ و ژ کوردایەتیێ دووره‌. ئه‌گه‌ر کوردستانیبوون وه‌ک پیڤان بێ گرتن چ تایبه‌تمه‌ندیا دێرسمێ نامینه‌ و هلبژارتنێن دێرسمێ ژی وه‌ک هه‌ر ده‌ڤه‌ره‌کێ بوو.

ل دێرسمێ دو ئالیان د هلبژارتنان دا ھەڤركیا ھەڤ دكرن. یەك به‌ربژێرێ پارتیا کۆمونیست یا ترکیێ بوو و ل همبه‌ر ڤێ ژی به‌ربژێرێ هەدەپێ یێ کو دوو پارتیێن چه‌پێن ترکی وه‌کی (ئه‌مه‌پە و ئه‌سەپێ) ژی پشتگریا هەدەپێ دکر، ده‌رباس بوو.

د ده‌ما پرۆپاگاندا هلبژارتنان دا به‌ربژێرێ پارتیا کۆمونیست داخوویاکرن و گۆت: سه‌رکه‌فتنا مه‌ نه‌ وندابوونا هەدەپێ یه‌، سه‌رکه‌فتنا وان ژی نه‌ وندابوونا مه‌یه‌. به‌ربژێرێ پارتیا کۆمونیست، فاتح ماچۆگلو، دخوه‌ست توندبوونا ناڤبه‌را خوه‌ و به‌ربژێرێ هەدەپێ دا ژ هۆلێ ڕاکه‌. ل هەمبه‌ر ڤێ داخوویانیا ماچۆگلو ژ ئه‌ندامێ ڕێڤه‌به‌ریا پەکەکێ ئالحه‌یده‌ر کایتانی ژ دێرسمێ به‌رسڤ هات. کایتان د نڤیسا خوه‌ یا ڕۆژنامه‌یا ئۆزگور پۆلیتیکایێ دا‌، دا خوویاکرن کو، بلا ماچۆگلو  دەست ژ به‌ربژێریا شه‌ره‌داریا دێرسمێ به‌ردە و پشتگریێ بده‌ به‌ربژێرێ هەدەپێ. کایتان ب ئاوایه‌ک دن ماچۆگلو ته‌هدید کر.

د ئه‌نجاما هلبژارتنان دا ماچۆگلو 32.7% ده‌نگ ئانین و سه‌رکه‌فت. هەدەپێ 28.2% ده‌نگ ده‌ستڤه‌ ئانین و هلبژارتن وندا کر.

لێ نرخاندن و شرۆڤه‌یێن د ده‌ربارێ هلبژارتنێن دێرسمێ دا‌ به‌رده‌وامن. وه‌ک کورده‌کی مرۆڤ ڤان مناقه‌شه‌یان دنێره‌ و دبێژه‌ حه‌یف و سه‌د مخابن، ل دێرسمێ کوردستانیبوون و کوردوه‌ری نینە، چه‌پتی و ڤێ یه‌کێ ڤه‌ گرێدایی پرسا مه‌زهه‌بی سه‌رده‌سته و ھەیە‌.

ل دهێرسمێ ناڤبه‌را هەدەپێ و پارتیا کۆمونییست دا‌ پرسه‌ک ئیدۆلۆژیک هاته‌ گۆتوبێژ کرن، که‌سه‌کی پرسا کورد وه‌ک بابه‌ته‌ک گرینگ نه‌ نرخاند و هه‌تا ژ بنی به‌حسێ وێ ژی نه‌کر. ژ بۆ ڤێ یه‌کێ ها ده‌رسم ها باژاره‌ک ل قراخێ ده‌ڤه‌را تراکیا قه‌ت فه‌رق نینە‌.

هنده‌ک ئالیێن سیاسی یێن ترکی ب گه‌له‌ک زانه‌بوون پرسا کورد ته‌نێ ب هەدەپێ ڤه‌ گرێددن، د بنگه‌هێ خوه‌ دا ئه‌ڤ ده‌ردۆر گه‌له‌ک ب زانه‌بوون ڤێ یه‌کێ دکن و ناخوازن پرسا کورد ل سه‌ر بنگه‌هێ کوردستانیبوونێ بێ گۆتوبێژ کرن. ژ بۆ وان پرسا کورد نه‌ پرسه‌ک نه‌ته‌وییه‌، ته‌نێ پرسه‌ک جڤاکیه‌.

ژ بۆ ڤێ جاردن گه‌له‌ک مخابن دێرسم ل کوردستانێ یه‌ ، لێ نه‌ کوردستانیه‌، دێرسم کورده‌ لێ نه‌ کوردپه‌وه‌رن ، دێرسم ل سه‌ر بنگه‌هه‌ک ئیدۆلۆژیک و مه‌زهه‌بی سیاسه‌تێ دکه‌.

دێرسم ناوه‌ندا سۆسیالزمێ یه‌……نه‌ ناوه‌نده‌ک کوردستانیێ یه‌….سۆسیالزما دێرسمێ نه‌ته‌وه‌ییا کوردایەتیێ قەبوول ناكە…..

2019.04.06

دارا بیله‌ک