پەیوەندی bergeh.com@gmail.com

شێخ عه‌بدولسه‌لامێ بارزانی/ ڤیدیۆ

شێخ عه‌بدولسه‌لامێ بارزانی/ ڤیدیۆ

شێخ عه‌بدولسه‌لامێ بارزانی

مه‌ولایێ من، سه‌میانێ من
ڕێبه‌رێ من ڕێزانێ من
شێخ عه‌بدولسه‌لام شێخێ من
ته‌ قوربان ڕوح و جانێ من

(سه‌ربه‌ند)

ل بارزان ده‌فێن زاهدان
جۆش خورووشا مریدان
نۆرا ئه‌زه‌ل گه‌شبوو ل شێخ
جه‌زبێن دێوانه‌ و مرشدان


هه‌مبه‌ری زۆریا زۆرداران
شێخ بوو یاوه‌رێ هه‌ژاران
ته‌مه‌ن کێمێ به‌رهه‌م گه‌له‌ک
ئه‌و په‌یره‌وێ پێخه‌مبه‌ران


هاتن شێروانی و مزۆری
گه‌ردی و هه‌رکی دۆله‌مه‌ری
فه‌دراسیۆنا بارزان چێکر
دگه‌ل به‌رۆژی و نزاری


ئه‌و فه‌دراسیۆنا عه‌شیران
بنگه‌هێ وێ ته‌کیا بارزان
شێخی کر هێزه‌کا زندی
بۆ هه‌موو شۆره‌شێن کوردان


جڤاک ڕێخست، ژینگه‌ھ پاراست
ل هه‌ر گوندی چێکر جڤات
ئۆل و مه‌زهه‌ب بێی جوداهی
ترازی کر دۆزا وه‌لات


ب ڕێ و مه‌شقان هه‌موارکرن
ب هزرا (خانی) کارکرن
شێخی ژ بۆ دۆزا وه‌لات
مریدێن خوه‌ چه‌کدارکرن


ل دوهۆک خاکا به‌هدینان
شێخ کۆمبوو دگه‌ل عه‌شیران
ڕێبه‌رێ هزرا نه‌ته‌وی
بنگه‌هێن خۆسه‌ریێ دانان


ژ بونا پێناسا کوردان
داخوازنامه‌ک دایه‌ سولتان
لێ ستانبولێ وه‌کی (ئیسیان)
داخوازا شێخی ل قه‌له‌مدان


ژ قۆجانس، ل هه‌کاری
چوو نه‌هری و ڕۆسیا ته‌زاری
ل ته‌فلیسا گورجستانێ
بۆ وه‌لات خوه‌زت ئالیکاری


بلندبوو ده‌نگێ ده‌هۆلێ
ڕۆم که‌فته‌ کار و پێکۆلێ
هاتن بارزان داگیرکرن
ئۆردی هاتن ژ ستانبولێ


بگرن به‌رده‌ن وه‌رنه‌ ڕێزێ
نابن ماف نابن بێی هێزێ
ژ چه‌قماقا تڤه‌نگا شێخ
بلند گه‌شبوو گوڕیا تێزێ


سوفی و زاهد و مریدان
قۆلێن دێوانه‌ و ئه‌گیدان
ل سه‌رێ (بازێ) و (شرین)ئ
تۆمارکر مه‌زترین داستان


خودێناسی، چاکی و ڤیان
ب ئازادی پێکڤه‌ژیان
په‌یاما شێخی به‌لاڤبوو
دادپه‌روه‌ری ژ بۆ هه‌میان


لێ مخابن ده‌ستێن گه‌مار
ده‌ستێن کوردێن خیانه‌تکار
شێخ و چه‌ند مرید د خه‌و دا
گرتن دانه‌ ده‌ستێ نه‌یار


وێران وێران، دونیا وێران
ده‌سهه‌لاتا ئالی ئۆسمان
ل مۆسلێ شه‌هیدکرن
چه‌ند مرید و شێخێ کوردان

پشتی هات و کر خزمه‌ت
بلندکر ئالا ته‌ریقه‌ت
خودانێ بارزان حه‌کیم بوو
ژێک ڤاڤارتن ئۆل و ده‌وله‌ت


ل سه‌ر وێ ڕێبازا جوان
ڕێبه‌رێن مه‌ هاژۆت کاروان
مه‌شا ده‌وله‌تبوونێ ڤه‌گرت
ل هه‌ر چار ئالیا کوردستان

تێكست : ئه‌دیب چه‌لکی
ئاواز : ژ ئاوازێن ده‌روێشی یێن کوردی
ستراندن : ڕێکێش سه‌یرانی