پەیوەندی bergeh.com@gmail.com

كورتەژیانا مەسرور بارزانی

كورتەژیانا مەسرور بارزانی


مەسرور بارزانی، كاندیدێ پارتیا دەمۆكراتا كوردستانێ ژبۆ پۆستا سەرۆكوەزیرتیا ھەرێما كوردستانێ، كورێ مەزن یێ سەرۆك مەسعود بارزانی یە، ئەو سالا 1969 ل باشوورێ كوردستانێ ژدایكبوویە.

 كا چەوا  سەرۆك مەسعود بارزانی  د 16 سالیا خوە دا بوویە پێشمەرگە و ئەو ھەر دەم دبێژە كو ژبۆ وی پێشمەرگاتی مەزنترین پلە و پۆستەیە و ئەو دێ ھەر وەكە پێشمەرگە بمینە. مەسرور بارزانی ژی د بھارا ژییێ خوە دا، ئانكو د 16 سالیا ژییێ خوە دا، سالا 1985 چەكێ پێشمەرگاتیێ ب ملێ خوە ڤەكریە و ب ئاوایەكێ گەلەك ژێھاتی، زیرەك و مێرخاسانە كەتیە ناڤ رەفێن پێشمەرگەیێن شۆرەشا گولانێ.

مەسرور بارزانی رۆلەكا بەربچاڤ  و چالاك د  داستانا خواكورك دا، سالا 1988 ێ ل دژی رژێما دكتاتوریا بەعس یا ژناچویی ھەبوو. سالا 1991ێ دگەل پێشمەرگە و خەلكێ كوردستانێ بەشداری د سەرھلدانا ل دژی حكومەتا عیراقێ كر و كوردستان ژ بن دەستێ دەستھلاتا رژێما فاشیا بەغدایێ رزگار كر.

مەسرور بارزانی خوەندنا ئامادەیی/ لیسە ل ئیرانێ تمام كریە و پاشی ڤەگەریایە كوردستانێ. پشتی دەمەكێ ژبۆ خاندنا زمانێ ئینگلیزی بەر ب بەریتانیایێ ب رێ كەتیە و ل وێرێ بەكالاریوس ب زمانێ ئینگلیزی وەرگرتیە.

مەسرور بارزانی  خاندنا تێكەلیێن ناڤدەولەتی ل زانینگەھا ئەمریكی ل واشینگتونێ تمام كریە و سالا 1998 ێ ڤەگەریایە باشوورێ كوردستانێ و دەست ب خەباتا سیاسی كریە.

د كونگرەیا 12 یا پارتیا دەمۆكراتا كوردستانێ دا، مەسرور بارزانی وەكە ئەندامێ سەركردایەتیێ  و پاشی  ژبۆ ئەندامێ مەكتەب سیاسیا پارتی ھاتیە ھلبژارتن.

سالا 1998 بوویە رێڤەبرێ گشتیێ ئاژانسا پاراستنێ .

سالا 2010 ێ د كونگرەیا 13 یا پارتیا دەمۆكراتا كوردستانێ دا  دەنگێن یەكەم ب دەست دخە و دبە ئەندامێ سەركرایەتیێ و پاشی دبە ئەندامێ مەكتەب سیاسی و ھەتا نھا بەردەوامە.

سالا 2012 دبە راوێژكارێ ئەنجومەنا ئاسایشا  ھەرێما كوردستانێ.

مەسرور بارزانی ژ سالا 1998ێ وەرە د سازیێن بلندێن ئاسایشێ دا  بەرپرسە و د ناڤا ڤان سالان دا ب ئاوایەكی سەركەفتی وەزیفەیا خوە ئەدا كریە و باشوورێ كوردستانێ كو دناڤا چار دژمنان دایە و دەڤەركا تژی ئاریشە و پرسگرێكە و چاردوورێن وێ تەروریستن و رۆژانە چەند كیلومەتر ژ ھەرێما كوردستانێ دوور كریارێن تەرۆریستی تێن ئەنجام دان، ئەو كاریە باشوورێ كوردستانێ ب ئارامی ب پارێزە و وەكە دەڤەراك ئارام  ژ بو حەواندنا خەلكێ ژ دەڤەرێن دن قەستا كوردستانێ دكن، ژبەر ھندی مەسرور بارزانی ب ئەندەزیارێ پاراستنا ئارامیێ تێ ناس كرن.

مەسرور بارزانی سالا 2005ێ دەزگەھێ خێرخازیێ بارزانی ئاڤاكریە و ڤێ سازیێ د ئالیكاریكرنا پەنابەر و لێقەومیان دا، چ ل باشوورێ كوردستانێ یان دەڤەرێن دن،  رۆلەكا مەزن ھەبوویە و ھەیە.

سالا 2013 ێ  زانینگەھا ئەمریكی ل باژارێ دھۆكێ ڤەكریە و ئەو سەرۆكێ بۆردا وێ زانینگەھێ یە.

مەسرور بارزانی د دەما شەرێ دژی تەرۆریستێن داعشێ دا رۆلەكا مەزن و ب باندۆر ھەبو، ژ ئالیەكێ ئەو راستەوخو مل ب ملێ پێشمەرگا د سەنگەرێن شەری دا بوو و ژ ئالیەك دن ڤە د وارێ لھەڤگوھەرتنا زانیاریێن ئیستیخباراتی دا دگەل ھەڤپەیمانیا ناڤدەولەتی  ژ بۆ لێدانا بنگەھێن تەرۆریستان رۆلەكا گرنگ ھەبوو.

مەسرور بارزانی ژبلی زمانێ كوردی، ئەو زمانێ عەرەبی، فارسی و ئننگلیزی دزانە. وی تۆرەكا بەرفرەھ یا تێكەلیێن دپلوماسی ل سەر ئاستا ھەرێمی و ناڤدەولەتی ھەیە، رۆلەكا مەزن د سەرخستنا رەفەرەندوما سەرخوەبوونا كوردستانێ دا ھەبوو.

مەسرور بارزانی خێزاندارە و سێ كور و كەچەك ھەنە.

ھەموو كوردستانی ل بەندا وێ رۆژێ نە كو مەسرور بارزانی ل سەر كورسیا سەرۆكوەزیرتیێ  دانیشە و ھێڤی و داخوازێن كوردستانیاب ب جی بینە، تخووبەكی ژ گەندەلیێ و گەندەلكاران را دەینە، چاكسازیان بكە، بانێ خزمەتگۆزاریان بلند بكە و ژین و ژیارا ھەڤولەتیان بەر ب بشتربوونێ ببە.