پەیوەندی bergeh.com@gmail.com

كێ دەرگەھێ باشوور ژ تركیێ را ڤەكریە

كێ دەرگەھێ باشوور ژ تركیێ را ڤەكریە

له‌یلا گوڤه‌ن، کو یه‌ک ژ پارلامه‌نته‌رێن پارتیا دەمۆكراتیك یا گەلان (هەدەپ)ێ یێن مه‌زهه‌ب پەکەکە یه‌، دبێژه‌: “دڤێ بارزانی و ده‌سه‌لاتدارێن هه‌رێما کوردستانێ ئاخا باشوورێ کوردستانێ ژ ترکیێ ڕا ڤه‌نه‌کن و ئه‌م ل هه‌مبه‌ری شاشیتیێن ب ڤی ئاوایی بێده‌نگ نامینن.”

عه‌جێبه‌.. پارتیا كاركەرێن كوردستانێ (پەکەکە) د ده‌مه‌کێ دا ڤێ داخوازێ ژ ڕێڤه‌به‌ریا باشوورێ کوردستانێ دکه‌ و ل هێڤیێ یه‌ کو حکومه‌تا کوردستانێ ڕێ ل پێشیا ئارتێشا ترکیێ بگره‌، لێ د هه‌مان ده‌مێ دا ئه‌و قه‌ت هه‌بوونا ڤێ ڕێڤه‌به‌ریێ نابینن و قه‌ت ژی ڤێ ڕێڤه‌به‌ریێ ناس ناکن و چ حورمه‌تێ ژێ ڕا ناگرن. ئه‌و یاسا و سه‌روه‌ری و ڕه‌واتیا هه‌رێما کوردستانێ بنپێ دکن. به‌رێ خوه‌ ددن باشوورێ کوردستانێ وه‌ک مالا بێخوه‌دی و تێ دا ڤه‌دگه‌ڤزن. شه‌رێ ترکیێ دکن، زیان ژی یا خه‌لکێ باشوورێ کوردستانێ یه‌. ئه‌ڤ ڕێڤه‌به‌ریا کو پەکەکە قه‌ت ئیتیرافێ پێ ناکه‌، لێ ده‌ما کو ئارتێشا ترکیێ وان دشکینه‌، داخواز ژێ دکن کو ڕێگریێ ل ئارتێشا ترک بکه‌.

ب ڕاستی به‌ریا کو ئارتێشا ترکیێ سینۆرێ باشوورێ کوردستانێ ده‌رباس کربه‌، پەکەکە سینۆر و ده‌سه‌لات و ڕه‌واتیا وێ بنپێ کریه‌ و باشوورێ کوردستانێ جهێ شه‌رێ خوه‌ یێ بێسوود ل دژی ترکیێ. یێ کو ئاخا باشوور ژ ترکیێ ڕا ڤه‌کریه‌، پەکەکە یه‌ و نه‌ حکومه‌تا کوردستانێ یه‌. یێ کو ئارتێشا ترکیێ دکشینه‌ ناڤا ئاخا باشوورێ کوردستانێ پەکەکە یه‌، نه‌ ده‌سه‌لاتدارێن هه‌رێما کوردستانێ نه‌. یێ کو ڕازیبوون دایه‌ ترکیێ کو هێزا خوه‌ بینه‌ ناڤا ئاخا باشوور، ڕه‌ڤا پەکەکێ یه‌ ژ مه‌یدانا وێ یا ڕاسته‌قینه‌ و خوه‌ مه‌لساندنا پەکەکێ یه‌ ل باشوور.

ڕێیا هه‌ری باش ژ بۆ کو ئارتێشا ترکیێ نه‌یێ ناڤا ئاخا هه‌رێما کوردستانێ، ئه‌وه‌ کو پەکەکە ل خوه‌ ڤه‌گه‌ره‌ و بچه‌ مه‌یدانا خوه‌ یا ڕاسته‌قینه‌ و داویا خوه‌سه‌پاندنا خوه‌ ل سه‌ر باشوورێ کوردستانێ بینه‌، هه‌روها حورمه‌تا وێ هه‌به‌ ژ بۆ ڕێڤه‌به‌ریا ڕه‌وا یا هه‌رێما کوردستانێ و ژیان و ئه‌وله‌هیا خه‌لکێ باشوورێ کوردستانێ لبه‌رچاڤ بگرە، کو نها ئه‌و خه‌لکێ سه‌ر سینۆر د ڕه‌وشه‌که‌ پر دژوار ده‌نه‌. ئارتێشا ترکیێ ب هنجه‌تا پەکەکێ تێ ناڤ ئاخا باشوور، پەکەکە ژی دکاره‌ وێ هنجه‌تێ ژ ترکیێ ڕا نه‌هێله‌.

پەکەکە د ده‌مه‌کێ دا ب هنجه‌تا کو باشوور نه‌ ته‌نێ ئاخا خه‌لکێ باشووره‌ و دڤێ ئاخا وێ ژ بۆ خه‌باتا هه‌موو ئالیان ڤه‌کری به‌، ب ڤێ هنجه‌تێ ڕه‌واتیێ دده‌ چه‌کدارێن خوه‌ کو ل باشوورێ کوردستانێ بن، لێ ئه‌و ب خوه‌ ل ڕۆژاڤایێ کوردستانێ، نه‌ ته‌نێ ڕێگریێ ل کوردێن پارچه‌یێن دن ئێن کوردستانێ دکن، لێ به‌لێ ڕێگریێ ل خه‌لکێ ڕۆژاڤا ب خوه‌ ژی دکن، ب تایبه‌تی ژی ئه‌و که‌سێن کو نه‌ سه‌ر ب پەکەکێ بن و ته‌ڤگه‌را سیاسی ژی ل سه‌ر وان قه‌ده‌خه‌ کرنه‌. ل پارچه‌یێن دن ئێن کوردستانێ ژی ڕێگریێ ل پارتیێن ڕه‌سه‌ن دکن و شه‌رێ وان دکن و ژ خوه‌ پێ ڤه‌ که‌سی قه‌بوول ناکن. پەکەکە ل دژی خه‌باتا نه‌ته‌وی و کوردستانی یا باشوورێ کوردستانێ یه‌ و ڕێڤه‌به‌ریا باشوور ب شۆفێنیزم و ڕه‌گه‌زپه‌ره‌ست بناڤ دکه‌.

پەکەکە دڤێ زانبه‌ کو باشوورێ کوردستانێ ب که‌د و هیمه‌تا بارزانی و جانگۆریا پێشمه‌رگه‌ و خوه‌راگریا خه‌لکێ کوردستانێ هاتیه‌. ئه‌ڤ ڕێڤه‌به‌ری ئازاد و پاراستی یه‌ و هاتیه‌ ناسکرن. ئاخا وێ ژ بۆ له‌شکه‌رێن چ ئالیه‌کی نه‌هاتیه‌ ڤه‌کرن و ڤه‌نابه‌ ژی. ئه‌گه‌ر پەکەکە هنجه‌تا نه‌ده‌ ئارتێشا ترکیێ و باشوور نه‌که‌ جهێ مه‌یدانا شه‌رێ خوە، وێ گاڤێ نه‌ ترکیه‌ و نه‌ ژی چ ئارتێشه‌ک دن دکاره‌ بێ ناڤا ئاخا باشوورێ کوردستانێ.

ئاریان فه‌ره‌ج