پەیوەندی bergeh.com@gmail.com

ل باکور “هه‌ڤال“ن و ل باشوور دبن “کاک

ل باکور “هه‌ڤال“ن و ل باشوور دبن “کاک

د سیاسه‌تێ دا ئیستیقرار و سه‌کنا سیاسی گه‌له‌ک گرینگه‌. ده‌ما ئینسانه‌ک ل گۆر به‌رژه‌وه‌ندیێن نه‌ته‌وی سیاسه‌تێ بکه‌ پیڤانێن وی/وێ ژی ب سه‌رێ خوه‌ نه‌. لێ مرۆڤ به‌ره‌ڤاژیێ ڤێ یه‌کێ سیاسه‌تێ بکه‌ و بوویه‌ره‌کی ده‌ بخوازه‌ هه‌لوه‌ستا خوه‌ دیار بکه‌ زه‌حمه‌تی و نه‌ زه‌لالی ده‌ردکه‌ڤه‌ هۆلێ.

مرۆڤ ڤێ یه‌کێ د گه‌له‌ک که‌س و که‌سایه‌تیێن کو پشگریا پککێ دکن ده‌ دبینه‌. هنده‌ک که‌س هه‌نه‌ ل باکور پشتگریا سیاسه‌تا پککێ دکن، لێ ل ڕۆژاڤایێ کوردستانێ ل دژ دسه‌کنن، هه‌روه‌ها هنده‌ک ل ڕۆژاڤا پشتگریێ دکن لێ ل باشوور ل هەمبه‌ر سیاسه‌تا پکک دبن خوه‌دی هه‌لوه‌ست. ئه‌ڤ یه‌ک نابه‌ و گه‌له‌ک ڤه‌کری ئه‌و که‌سێن دبن خوه‌دی ڤێ هه‌لوه‌ستێ سیاسه‌ته‌ک دوروو ڕێڤه‌ دبن.

ل باکورێ کوردستانێ پکک چبه‌ ل هه‌می ده‌ڤه‌رێن دن ژی ئه‌وه‌. ئانكو ب زمانه‌ک زه‌لالتر، پکک، پید، هدپ، یبش، کجک و هه‌موو ئالیێن ڤان ڤه‌ گرێدایی و یێن د بن باندۆرا وان ده‌، یه‌ک سیاسه‌تێ بڕێڤه‌ دبن. سیاسه‌تا وان ژ یه‌ک سه‌رەکانیێ ده‌ردکه‌ڤه‌ و ئارمانجێن وان یێن نوكە ده‌ چ گوهه‌رتن نینە.

لێ ل ڤێ ده‌رێ پرس نه‌ سیاسه‌تا پککێ یه‌ ، پرس سیاسه‌ت و هه‌لوه‌ستا به‌شه‌ک ژ که‌سایه‌تیێن کورده‌. تو ل باکور پشتگریا هدپێ بکی، نابه‌ ل باشوور ل دژێ سیاسه‌تا ته‌ڤگه‌را ئازادی بسه‌کنی. د هه‌مان ده‌می ده‌ ل ڕۆژاڤا پشتگریا پیدێ بکی نابه‌ ل باکور ل دژێ هدپێ بسه‌کنی. ئه‌ڤ سیاسه‌ته‌ک چه‌وته‌ و زانه‌بوون ل دژی سیاسه‌تا خه‌تا نه‌ته‌وی تێ ڕێڤه‌برن.

تێ زانین کو ئارمانجا سیاسه‌تا پککێ یا هه‌ری داوی، هه‌موو هێز و ئالیێن کوردستانی ب ئاوایه‌کی تێکببه‌ و ب ته‌مامی کوردستانێ ڕاده‌ستێ ده‌وله‌تێن داگیرکه‌ر بکه‌. ده‌ما ڤێ یه‌کێ ژی دکه‌ گه‌له‌ک ب زانه‌بوون زه‌مینێ ژ سیاسه‌تا خوه‌ ڕه‌ ئاماده‌ دکه‌. ئه‌ڤ ژی د ڕۆژا مه‌ ده‌ “ جومهوریه‌تا ده‌مۆکراتیک“ ە ئو خه‌ته‌ریا هه‌ری مه‌زن ئه‌وه‌ کو ناڤێ کوردستانێ ناھێت ب کارانین و هه‌روه‌ها ئالا کوردستانێ ژی وه‌ک سه‌مبۆلا نه‌ته‌وی قه‌بوول ناكن.

ده‌ما که‌سایه‌تیه‌ک سیاسی ل باشوورێ کوردستانێ ئالا کوردستانێ د ده‌ستێ خوه‌ دا بهه‌ژینه‌ و ل ڕۆژاڤایێ کوردستانێ ل هەمبه‌ر داخستنا ئالا کوردستانێ بێ ده‌نگ بمینه‌ نابه‌ و ئه‌ڤ دبه‌ میناكاھەری به‌ربچاڤ یا سیاسه‌تا دورووتی و که‌سایه‌تیه‌ک لاواز.

تێ زانین کو گه‌له‌ک که‌سێن سیاسه‌تێ ڤه‌ مژوولن و ژ باکورێ کوردستانێ نه‌ ئو ل باشوور کارێن بازرگانی دکن، پرانیا وان ل گۆر به‌رژه‌وه‌ندیێن خوه‌ یێن که‌سایه‌تی بازرگانیا خوه‌ ڕێڤه‌ دبن. ل باکور هاڤالبه‌ندێن پککێ نه‌ و ل باشوور دبن هه‌ڤالبه‌ندێن پدکێ. ئانكوب زمانه‌ک دن ل باکور “هه‌ڤال“ن و ل باشوور دبن “کاک“.

ڕێڤه‌برنا سیاسه‌ته‌کا بێنرخ و که‌سایه‌تێن لاواز سیاسه‌تێ دله‌وتینه‌. لێ مخابن ئیرۆ ڕۆژ ڕۆژا وانه‌. مرۆڤ چبه‌ دڤێ ئه‌و به‌ و ل گۆر باوه‌ریا خوه‌ سیاسه‌تێ بکه‌ و به‌رژه‌وه‌ندیێن که‌سایه‌تی ته‌ڤلی سیاسه‌تێ نه‌که‌. لێ دڤێ مرۆڤ ببینه‌ کو کێماسی ب ته‌نێ نه‌ یا وانه‌، کێماسی یا سیسته‌ما کو تێ ده‌ کار دکن ژیە. ژ به‌ر کو ئه‌ڤ سیاسه‌تا بێ نرخ و که‌سایه‌تیا لاواز ل حه‌سابا ئالیێن سیاسی ژی دھێت. ژ خوه‌ مالوێرانیا مه‌زن ژی ئه‌ڤه‌یە.

ژ بۆ ڤێ یه‌کێ د قۆناخا کو ئه‌م لێ دژین ده‌، که‌سایه‌تیێن کو سیاسه‌تێ ب نرخ دکن و ل سه‌ر خه‌ته‌ک نه‌ته‌وی ب که‌سایه‌تیەک بلند د ناڤا سیاسه‌تێ ده‌ نه‌، گه‌له‌ک زه‌حمه‌تیێن مه‌زن دبینن. ژ به‌ر کو سیاسه‌تا ب شەخسیەت ل حه‌سابێ وان كەسا ناھێت یێن سیاسه‌تێ ل گۆر به‌رژه‌وه‌ندیێن که‌سایه‌تی و بازرگانی دکن.

لێ هه‌رکه‌س ژی دزانه‌ کو ده‌ما سیاسه‌ت ب نرخ و که‌سایه‌ته‌ک ب هێز نه‌وێ کرن دێ هه‌ر داویێ خوسارەت به‌ و سیاسه‌تا بێ پیڤان و بێ نرخ چ پاشەرۆژ نینە.

دارا بیلەك

02.02.2019