پەیوەندی bergeh.com@gmail.com

ل رۆژئاڤا چ ئاسویه‌ک ژ بۆ یه‌کگرتنا کوردان دیار ناکه‌

ل رۆژئاڤا چ ئاسویه‌ک ژ بۆ یه‌کگرتنا کوردان دیار ناکه‌

فه‌رەچ میرزا د به‌رسڤێن ڕۆژه‌ڤاکورد ده‌ دبێژه‌: گه‌لۆ دێ پکک ڤێ چه‌ندێ قه‌بوول بکه‌ ب ئالیێن کوردی یێن دن ڕا ل ڕۆژاڤا به‌ره‌یه‌کی کوردستانێ ئاڤا بکه‌؟ ئه‌ڤ نه‌ ممکنه‌.

ڕۆژه‌ڤاکورد: ل ڕۆژاڤایێ کوردستانێ ده‌رفه‌ته‌ک دیرۆکی خوویا دکه‌. کورد ژی نه‌ یه‌کالینه‌. ب دیتنا وه‌ چ پێوسته‌ بێ کرن ژ بۆ ئه‌ڤ ده‌رفه‌ت ژ ده‌ست نه‌چه‌؟

فه‌رەج مرزا: ئه‌گه‌ر کورد ل ڕۆژاڤایێ کوردستانێ نه‌ بن یه‌ک و به‌ره‌یه‌ک کوردستانی مینا، به‌ره‌یێ کوردستانی ل باشوور به‌ریا سه‌رهلدانا سالا ۱۹۹۱ێ، پێک نه‌ئینن دێ ئه‌ڤ ده‌رفه‌تا زێرین و هه‌ر تشت ژ ده‌ست کوردان بچه‌. لێ پسیار ل ڤر ئه‌وه‌؛ گه‌لۆ دێ پکک ڤێ چه‌ندێ قه‌بوول بکه‌ ب ئالیێن کوردی یێن دن ڕا ل ڕۆژاڤا به‌ره‌یه‌کی کوردستانێ ئاڤا بکه‌؟ ئه‌ز دبێژم ئه‌ڤ یه‌ک نێزیکی موسته‌حیلێ یه‌.

ڤه‌کشاندنا هێزێن ئه‌مه‌ریکی چ باندۆرێ ل هه‌رێمێ دکه‌ و ب تایبه‌تی ژ بۆ ڕۆژاڤایێ کوردستانێ چ سه‌ناریۆ هه‌نه‌؟

ڤه‌کشانا هێزێن ئەمریکایێ ژ ڕۆژاڤا دێ ببه‌ سه‌ده‌م کو، هێزێن پەیەدێ و ڕێڤه‌بریا وێ، ژ ترسا ئێریشێن ترکیه‌یێ، ب یه‌کجاری به‌ر ب ڕژێما سوریێ ڤه‌ بچن، بێی کو ل هه‌به‌ری وێ یه‌کێ چ مافان ژ سوریه‌یێ داخواز بکن. لێ به‌لێ گه‌له‌ک ب زه‌حمه‌ته‌ ئەمریکا ڕۆژاڤا، و هه‌روه‌سا سوریه‌یێ، ته‌سلیمی ترکیه‌یێ بکه‌، ژ به‌ر کو هینگێ دێ ئه‌و ته‌سلیمی ئیرانێ ببن و ئیران دێ ل وێ ده‌ڤه‌رێ ببه‌ خوه‌دی ده‌ستهلات، ئەمریکا ژی ڤێ یه‌کێ قه‌بوول ناکه‌. ب دیتنا من ئیسرائیل دێ ڕۆله‌که‌ ڤه‌شارتی هه‌به‌ کو ئەمریکا ده‌ڤه‌رێ ته‌سلیمی ئیرانێ نه‌که‌.

ئه‌نەکەسە ژ ده‌ستپێکا شۆره‌شا سوری ڤه‌، ب ئۆپۆزیسیۆنا سوری ڕه‌ یه‌ و ب وێ ڕه‌ په‌یامه‌ک ژی ئیمزه‌ کریه‌. پەیەدە/ته‌ڤده‌م ژی ژ ده‌ستپێکێ ڤه‌ و هه‌تا نها ب ڕه‌ژمێ ڕه‌ یه‌. ل گۆر وه‌ ژ ڤان هێزان چ تێ خوه‌ستن؟

ئه‌نەکەسه‌ ل سه‌ر ئاستا ناڤده‌وله‌تی گه‌له‌ک ژ پیدێ پێتر دهێت قه‌بوول کرن، لێ ل سه‌ر ئه‌ردی، ل ڕۆژاڤایێ کوردستانێ، ئه‌گه‌ر جه‌ماوه‌رێ خوه‌ ژی هه‌به‌ لێ وێ باندۆرا خوه‌ نینه‌، چونکی هێزا وێ یا چه‌کداری ل وێ ده‌رێ نینه‌.

ئه‌گه‌ر له‌شکه‌رێ ڕۆژ و هێزێن پەیەگێ ببن یه‌ک هێز هینگێ دێ ڕه‌وشا ڕۆژاڤایێ کوردستانێ گه‌له‌ک گه‌له‌ک باشتر ببه‌، لێ دیسان ژی ئه‌ز دبێژم ئه‌ڤ یه‌ک نێزیکی موسته‌حیلێ یه‌ ژ به‌ر سیاسه‌ت و ئیدۆلۆژیا پەكەكێ.

باندۆرا هێزێن ناڤنه‌ته‌وی و یێن هه‌رێمی ل سه‌ر پێشه‌رۆژا سوریه‌ بوویه‌ یه‌که‌م، گه‌لۆ د ڤی واری ده‌ کورد دکارن چ بکن و چه‌وه‌ سودێ ژ ڤێ ڕه‌وشێ بگرن ؟

کورد ل ڕۆژاڤا و ل هه‌موو پارچه‌یێن دن یێن کوردستانێ نه‌ خوه‌دی کارتێن بهێزن. ژ به‌ر کو کورد نه‌ ده‌وله‌تن، ل داویێ هه‌ر ده‌وله‌تن سلحێ دکن، خوه‌دی هێزن و باندۆره‌ وان یا سیاسی، ئابۆری و له‌شکه‌ری هه‌یه‌، و ئه‌و ده‌وله‌ت به‌رژه‌وه‌ندیێن خوه‌ ل به‌ چاڤان دگرن و مله‌تان پشتگوه داڤێژن.

هێز و باندۆره‌ کوردان د یه‌کگرتنا وان دایه‌ و، ب مخابنێ ڤه‌، دبێژم چ ئاسویه‌ک ژ بۆ یه‌کگرتنا کوردان دیار ناکه‌.