پەیوەندی bergeh.com@gmail.com

ل سوریێ که‌سه‌ک ژ کوردان را نا بە خوه‌دی نه‌ کورد ب خوه‌ بن

ل سوریێ که‌سه‌ک ژ کوردان را نا بە خوه‌دی نه‌ کورد ب خوه‌ بن

شێرکۆ عه‌گید د به‌رسڤا پرسێن ڕۆژه‌ڤاکورد دا دبێژه‌: ئه‌ز دبینم کو هه‌ر چار وه‌لاتێن خوه‌دی باندۆر د سووری دا (ئه‌مریکا، ئیران، ڕۆسیا و تورکیا) وێ د ناڤ خوه‌ دا چاره‌یەکی په‌یدا بکن، لێ ئه‌ڤ چاره‌ وێ نه‌ ب دلێ کوردان بە و نه‌ ژی ب دلێ پەیەدێ و ڕژێما سووریێ بە.

ڕۆژه‌ڤاکورد: ل ڕۆژاڤایێ کوردستانێ ده‌رفه‌ته‌ک دیرۆکی خوویا دکه‌. کورد ژی نه‌ یه‌کالینه‌. ب دیتنا وه‌ چ پێوسته‌ بێ کرن ژ بۆ ئه‌ڤ ده‌رفه‌ت ژ ده‌ست نه‌چه‌؟

شێرکۆ عه‌گید: یا هه‌ری گرنگ د باوەریا من دا، ئه‌وه‌ کو هه‌موو هێزێن ته‌ڤگه‌را سیاسی ل ڕۆژاڤایێ کوردستانێ باش بزانن کو ئه‌ڤ ده‌رفه‌تا دیرۆکی جاره‌که‌ دی ڤه‌ناگه‌رێ و دۆباره‌ نا به‌. ژ به‌ر ڤێ یه‌کێ ئه‌و گه‌له‌ک پێویسته‌ کو هه‌ر ئالیک، گاڤه‌کی ب به‌ر ئالییێین دی دا باڤێژێ ، ده‌ستێ هه‌ڤکاری و براتیێ درێژ بکێ ،ئو ناکۆکیێن خوه‌ یێن سه‌ره‌که‌ بدن ئالکی، ئوو ب براتی، ب هه‌ڤ ڕا دیالۆگێ بکن و ته‌نێ به‌رژه‌وه‌ندیێن گه‌لێ مه‌ بدن به‌ر چاڤێن خوه‌.

هه‌ر که‌س دزانێ کو نه‌ باز و نه‌ ژی که‌ڤۆک دکارن ب یه‌ک باسک بفرن. ئێدی بلا هێزێن سه‌رده‌ست ڤێ ڕاستی یێ ب بینن.

ڤه‌کشاندنا هێزێن ئه‌مه‌ریکی چ باندۆرێ ل هه‌رێمێ دکه‌ و ب تایبه‌تی ژ بۆ ڕۆژاڤایێ کوردستانێ چ سه‌ناریۆ هه‌نه‌؟

وه‌ک ئه‌م دبهیسن و دبینن دیارە کو هێزێن ئه‌مه‌ریکی ب ته‌مامی ده‌رناکه‌ڤن، و ئه‌ڤ تشته‌ک باشه‌ ژ کوردان ڕا، لێ دیسا ژی، هه‌یه‌ ئه‌ڤ پێنگاڤ ژی تشته‌ک ده‌مکی بێ . هه‌گه‌ر ئه‌م هه‌می هێڤیێن خوه‌ ب ئه‌مریکا ڤه‌ گرێ بدن وێ تشتا ل عه‌فرینێ هاتی سه‌رێ مه‌ دیسا دۆباره‌ ببێ. دڤێ ئه‌م ژ بیر نه‌ کن کو ئەمریکا گه‌له‌ک جاران ده‌ڤ ژ دۆستێن خوه‌ به‌ردایه‌ ژ به‌ر به‌رژه‌وه‌ندی یێن خوه‌.

تورکیا دخازێ گوهه‌رتنه‌ک دیمۆگرافی ل ڕۆژاڤایێ کوردستانێ بکێ، ب هێجه‌تا چالاکیێن پەیەدێ نێزیکێ سینۆرێ وێ. لێ خوه‌ش به‌ختانه‌، وه‌لاتێن دی یێن خوه‌دی باندۆر و به‌رژه‌وه‌ندی ڤێ یه‌کێ قه‌بوول ناکن.

ئه‌ز دبینم کو هه‌ر چار وه‌لاتێن خوه‌دی باندۆر د سوریێ دا ( ئه‌مریکا، ئیران، ڕۆسیا و تورکیا) وێ د ناڤ خوه‌ دا چاره‌یەکێ په‌یدا بکن لێ ئه‌ڤ چاره‌ وێ نه‌ ب دلێ کوردان بێ و نه‌ ژی ب دلێ پەیەدێ و ڕژێما سوریێ بێ.

ئه‌نەکەسە ژ ده‌ستپێکا شۆره‌شا سوری ڤه‌، ب ئۆپۆزسیۆنا سوری ڕه‌ یه‌ و ب وێ ڕه‌ په‌یامه‌ک ژی ئیمزه‌ کریه‌. پید/ته‌ڤده‌م ژی ژ ده‌ستپێکێ ڤه‌ و هه‌تا نها ب ڕه‌ژمێ ڕه‌ یه‌. ل گۆر وه‌ ژ ڤان هێزان چ تێ خوه‌ستن؟

بێ گومان ئه‌ڤ نه‌ ڕێیا ڕاسته‌. ده‌ما هێزێن مه‌ به‌لاڤ ببن ناڤ وان هه‌ردوو ئالییا دا بریارا مه‌ دکه‌ڤێ ده‌ستێ وان دا .هه‌م ده‌نگ و هێزا مه‌ وێ کێمتر بێ ،هه‌م ئه‌مێ باجا تێکلییێن وان هه‌ردوو ئالییان ب هه‌ڤره‌ ،بدن .هه‌گه‌ر ل هه‌ڤ هاتن یان ژی شه‌رێ وان به‌رده‌وام کر ئه‌مێ باجا ڤێ یه‌کێ بدن. نه‌ ڕژێم و نه‌ ژی ئۆپۆزسیۆنا سوری جهێ باوه‌ریێ نه‌،

هه‌گه‌ر مه‌ نه‌کاری ڕێیا سێیه‌م ژ خوه‌را په‌یدا بکن، ئه‌م نکارن مافێ گه‌لێ خوه‌ مسۆگه‌ر بکن ڕێیا سێیه‌م ژی ب ده‌ست مه‌ ناکه‌ڤێ هه‌گه‌ر پەیەدە ژ ڕێبازا کوردایه‌تیێ دوور بێ و خوه‌ لێ نه‌کێ خوه‌دی.

ئه‌نکس ژی ،دڤێ بزانێ کو ئه‌و هێزه‌کە خورت ددن ئۆپۆزسیۆنێ ، لێ مخابن، ئۆپۆزسیۆنا سوری ، نه‌ دکارێ و نه‌ دخوازێ کو ئه‌نکس خورت بێ.

که‌سه‌ک ژ کوردان ڕا نا بێ خوه‌دی نه‌ کورد ب خوه‌ بن.

باندۆرا هێزێن ناڤنه‌ته‌وی و یێن هه‌رێمی ل سه‌ر پاشه‌رۆژا سوریه‌ بوویه‌ یه‌که‌م، گه‌لۆ د ڤی واری ده‌ کورد دکارن چ بکن و چه‌وه‌ سودێ ژ ڤێ ڕه‌وشێ بگرن.

تا پرۆبله‌مێن ته‌ڤگه‌را سیاسی چاره‌سه‌رنه‌بن، کورد نکارن سودێ ژ ڤێ ڕه‌وشێ بگرن. ته‌نێ چالاکییێن دپلۆماسی ب وان وه‌لاتان ڕا، و ب تایبه‌ت، دۆستێن کوردا، دکارێ ئالیکاریێ بکه‌ و هن مافێن گه‌لێ مه‌ بپارێزێ.

هه‌رێما کوردستانێ ژی دکارێ ڕۆله‌کی مه‌زن بله‌یزه‌ و پشتگێریەک خورت بدێ گه‌لێ مه‌.

ڕه‌وشا پاشه‌رۆژا سوری قه‌ت نه‌ زه‌لاله‌ ئو ژ بۆ هه‌می زه‌حمه‌تیان ڤه‌کری یه‌.