پەیوەندی bergeh.com@gmail.com

مەترسيا پەكەكێ ل سەر ئارامیا هەرێما كوردستانێ

مەترسيا  پەكەكێ ل سەر ئارامیا هەرێما كوردستانێ

دەمەكە هەرێما كوردستانێ بويە مەيدانا جەنگێ د ناڤبەرا پارتیا كاركەرێن كوردستانێ (پەكەكە) و لەشكەرێ توركيا دا كو ل گەلەك دەڤەرێن سنورى يێن دناڤبەرا هەرێما كوردستانێ و باكورێ كوردستانێ (وەلاتێ توركيا) دا ب بەردەوامى پێكدادان دروست دبن و ئەو  بوينە ئەگەرێ نەئارامی و نەساقامگيريێ ل هەرێما كوردستانێ، زێدەبارى زيانێن گيانى و ماددى بەر هاولاتيێن هەرێما كوردستانێ دكەڤن.

 هەر وەكى يا ديار بو دەما چەندين سالانە پارتیا كاركەرێن كوردستانێ بارەگايێن خو ل ناوچەيێن جودا جودا يێن هەرێما كوردستانێ داناينە وەكو جهەك ژ بو خو ڤەشارتنێ ژ هێزێن توركيا، ژبەر ئەڤێ بيانويێ ژی پەكەكێ دەست  ب سەر ب سەدان گوندێن هەرێما كوردستانێ دا گرتيە و ناهێلە خەلكێن ئەڤان گوندان سەرەدانا گوند و وارێن خوە بكەن.

 مەیدانا خەباتا پەكەكێ كوردستانا باكور و  وەلاتێ توركيا يە، بەلێ  د مێژويا خو دا و هەتا نوكە پارتیا كاركەرێن  كوردستانێ نەشيايە رولەكێ هوسان بگێرە كو كوردێن باكوور شانازيێ پێ بكەن، بەلكو بەروڤاژى، ب زوريكرنا زارۆك و سنێلەيان بەرەڤ چيان ب مەرەما خەباتا چەكدارى و ژ بو پارێزگاريا بەرژەوەنديێن چەند كەسەكان يان چەند گروپان ئەڤان سنێلەيێن كورد ب كوشتن ددەن، زێدەبارى ڤێ ژی، پەكەكە باجێ ژ پرانیا سەروك خێزانێن كورد  ل ناوچەيێن كوردستانا باكور و هاولاتيێن كوردێن باكور يێن ل وەلاتێن ئەوروپا نێشتەجێ، ب مەرەما هاريكاريكرنا پەكەكێ،باجێ وەردگرە. ژ بەر ڤان رەفتاران، د نوكە دا  رێژەيەكا بەرچاڤ ژ كوردێن باكوور  ل هەمبەر سياسەتا پەكەكێ نەرازيبون و تورەيى و گازندەيێن مەزن هەنە، باشترين گروڤە كێمبونا دەنگێن پارتێن كوردى ل ناوچەيێن كورد نشين ل وەلاتێ توركيا یە.

  بەردەواميا هێرشێن لەشكەرێ توركيا بو سەر ئاخا هەرێما كوردستانێ ژبەر هەبونا هێزێن چەكدارى يێن پارتیا كاركەرێن كوردستانێ يە كو ژبلى جهێ مەترسيێ نە ل سەر “ئاسايشا” وەلاتێ توركيا، د هەمان دەم دا ئەو بوينە گەفەك ل سەر ئاسايش و سەقامگيريا سياسى ل هەرێما كوردستانێ و ب بەردەوامى گرفتان ژبو هەرێما كوردستانێ دروست دكە.

 پەكەكە، ل شوونا پشتەڤانیكرن و پارێزگاريكرن ل كوردێن باشوور، د نوكە دا روژ ب روژ ھەولا تێكدانا دەستكەفتى، ئارامى و سەقامگيريا هەرێما كوردستانێ دكە، ئەو بويە ئالاڤەك ژبو خزمەتكرنا بەرژەوەنديێن هندەك وەلاتێن دوژمنێن سەرسەختێن كوردان.

ب ديتنا من نوكە  و ل پاشەروژێ ژی پارتیا كاركەرێن كوردستانێ ژ بو تێكدانا رەوشا هەرێما كوردستانێ مەزنترين گەفە، لەورا باشترين بژاردە پێدڤيە پەكەكە ئاخا هەرێما كوردستانآ چول بكە و بەرەڤ وەلات و ئاخا خو بچە و ژ پێخەمەتا بدەستخستنا مافێن كوردان ل باكورێ كوردستانێ خەباتێ ژبو كوردێن باكور بكە.

ئاشتى فەتحى بێسفكى

2019.07.21