پەیوەندی bergeh.com@gmail.com

ژ بۆ كوردا ئاشتی چیە

ژ بۆ كوردا ئاشتی چیە

یەكێ ئیلۆنێ وه‌ک ڕۆژا ئاشتیێ ل جیهانێ تێ قه‌بوول کرن. د ڕاستیا خوه‌ دا ئه‌ڤ یه‌ک ته‌نێ بوویه‌ وه‌ک سه‌مبۆله‌کی و که‌سه‌ک د جیهانێ دا گوھ ناده‌ ناڤه‌رۆکا ڤێ ڕۆژێ. پرانی ژی وه‌لاتێن کو شه‌ر لێ هه‌یە وئەو جڤاتێن کو ژ هه‌موو جوره‌یێ ئاشتیێ دوورکه‌تینە به‌حسا ڤێ ڕۆژێ دکن. به‌حسا ئاشتیێ دکن. لێ د ڕوحیه‌تا وان ده‌ ئاشتی نینە.

ژ بۆ کوردا ئاشتی گه‌له‌کی تشته‌کی گرینگ و خوه‌دی ناڤه‌رۆکه‌ک تایبه‌ته‌. لێ مخابن چ شانسێ کوردا کو د ناڤا ئاشتیێ دا بژین نینە. هه‌تا کو کورد د وه‌لاتێ خوه‌ دا نه‌سه‌ربخوه‌بن و ب ئازادی نه‌ژین ئاشتی ژ بۆ وان ژ گۆتنێ وێده‌تر نه‌ خوه‌دی چ واته‌یه‌کێ یه‌.

گه‌له‌ک ئالیێن سیاسی و جڤاکی د ڤێ ڕۆژێ دا داخوویانیا ڕادگەهینن و به‌حسا گرینگیا ئاشتیێ دکن. ئاشتی گه‌له‌ک هێژایه‌ و گۆتنه‌ک پیرۆزه‌. لێ مخابن کورد د ڕاستیا ژیانا خوه‌ دا، ژ ڤێ یه‌کێ دوورن. نها ده‌ستکه‌فتیا کوردا یا هه‌ری مه‌زن ل باشوورێ کوردستانێ یه‌. کوردا ب ڕه‌فه‌راندومێ گاڤه‌ک به‌ر ب سه‌رخوه‌بوونێ ڤه‌ ئاڤێتن و هه‌ولدانه‌ک دیرۆکی کرن کو ب ڕێیه‌ک ئاشتیانه‌ سه‌رخوه‌بوونێ ده‌ستڤه‌ بینن و وه‌لاتێ خوه‌ دا ب ئازادی بژین. لێ هه‌رکه‌سه‌کی دیت کو بوون ئارماناجا ئێریشێن ده‌وله‌تێن هه‌رێمێ و عیراقێ و هه‌تا به‌شه‌ک ژ کوردان ژی ب ڕێیا خیانه‌تێ ل ته‌نشتا دژمنێن کوردا و ل دژی داخوازا ئاشتیێ جھ گرتن.

ل ڕۆژاڤایێ کوردستانێ ده‌ستهلاتداریا کو هه‌یە، د ناڤا خوه‌ ب خوه‌ دا ل دژی ئاشتیێ دراوەستە. ژ بلی خوه‌ چ ھێزەك دن قه‌بوول ناکه‌ و ڕێ ناده‌ چ رێكەفتنێن ئاشتیێ ژی. لێ مخابن ژ هه‌ر که‌سه‌کی پتر به‌حسا ئاشتیێ دکن.

ڕۆژهلاتێ کوردستانێ ژ خوه‌ ناڤێ ئاشتیێ ، وندایه‌ ، نینە و قه‌ده‌خه‌یه‌.
ل باکورێ کوردستانێ ده‌ما به‌حسا ئاشتیێ تێ کرن، شه‌ر تێ بیرا مرۆڤ. دڤێ ئالیێن سیاسی ل باکورێ کوردستانێ ده‌ما به‌حسا ئاشتیێ دکن ، پێوسته‌ ناڤه‌رۆکا وێ ئاشتیێ ژی زه‌لال بکن. ئاشتیه‌ک چه‌وها؟ ئه‌گه‌ر مه‌خسه‌ت ژ ئاشتیێ سه‌کناندنا شه‌رێ د ناڤبه‌را هێزێن ده‌وله‌تا ترکیه‌ و پەکەکێ دا بە ، ئه‌ڤ نایێ واته‌یا ئاشتیه‌کێ د ناڤا کوردا و ترکان دا.

ل ترکیه‌ و باكورێ كوردستانێ ئاشتی ب ته‌نێ ب ده‌ستخستنا ستاتویه‌کی یا کوردستانی دا پێک تێ. ئه‌گه‌ر وه‌لاته‌کی دا نۆرمێن ده‌مۆکراسیێ نه‌یێن ب جھکرن دێ ئاشتی چه‌وا پێکوه‌رە؟ نه‌ ممکنه‌. هه‌تا کو، کورد ل باکورێ کوردستانێ نه‌گەهن مافێن خوه‌ یێن ڕه‌وا کو ئه‌و ژی مافێن نه‌ته‌وینه‌، ده‌مۆکراسی و ئاشتێ چ جارا پێكناھێت.

ژ بۆ کوردا ئاشتی پشتی بده‌ستخستنا مافێن نه‌ته‌وی پەیدا دبه‌.

2019.09.01

ن. فرات