پەیوەندی bergeh.com@gmail.com

کوردستانەک بهێز کاریزمایێن بهێز دڤێن

کوردستانەک بهێز کاریزمایێن بهێز دڤێن

رولا سەرکردەیان یان سیاسیان بو بونیاتدانا وەلاتەکێ بهێز گەلەك گرنگە، نەخاسمە ئەگەر ئەو کەسایەتیە ژلایێ سیاسی و ئیداری ڤە خودان سەربوربن، چونکە ئیدارکا باش پێویستی ب چەندین بنەما هەیە بو هندێ خزمەتا گشتی یا هاولاتیان بهێت کرن.

  نێچیرڤان بارزانی ئەو کەسەیە یێ کو ژ گەلەک ئالیان ڤە بویە جهێ باوەری و متمانا خەلکێ کوردستانێ، ل نەخوشترین دەم دا تایبەت دەمێ ئابلوقێن ئابوری و سیاسی ئەو شیا کوردستانێ ژ قوناغەکێ ببە قوناغەک بهێزتر.

ل دەما ھەبوونا ناکوکیێن سیاسی دنافبەرا هێز و لایەنێن سیاسی دا لسەر هەر بابەتەکێ بە، نێچیرڤان بارزانی  وەکو ئەندازیارەكی شیایە چارەسەریێن بنەرت بو ئەوان ناکوکیان ببینە و کێشە و گرڤتان بدە ئالەكی و بەرژوەندیا خەلکی ل بەر چاڤان بگرە.

  ژلایێ پارتایەتی ڤە، دبە گەلەک ژ کادرێن پارتی لدەمێ خودا دگەل هندێ نەبوینە دەرگەهێ دان وستاندنا دگەل هندەک هێز و گروپان بهێتە ڤەکرن چونکە لدەمێ خودا ئەوان هێزا دژبەریا ماڤێن رەوایێن خەلکی دکرن، بەلێ بو هندێ کو ئەڤ دەستەکەفتێن مللەتێ کورد ب هەروەیی نەچن کاک نێچیرڤانی هەمی دەرگەهێن گرتی ب سیاسەتا خویا حەکیمانە ڤەکرن و ئایندێ مللەتێ کورد ژی گەهاندە قوناغەک دی و باشترین نمونە ژی دوماهیک رێکەفتنا پارتی و ئێکەتی یە. جارێ گرنگ نینە ج هێزەک چ پوست و پلە وەرگرتینە، گرنگیا وێ ل وێ خالێ دایە کو خەلکێ کوردستانێ ژلایێ دەرونی ڤە ئارام ببە و هەست ب دلنیا بوونا سیاسی بکە و ئەو کوردستانا خەلک چاڤەرێ دکە کو یا بهێز بە پێدڤی ب عەقل و لوژیکێن بهێز هەنە.

  دەڤەر ب گشتی و عێراق ب تایبەت چاڤەرێ گوهورینێن مەزن دکن، چ ئەو گوهورین جوگرافی بن یانژی ئابوری و سیاسی، لەورا دڤێت حازریەک باش بهێتە کرن ژلایێ هەرێما کوردستانێ ڤە وبو هەر ئەگەرەکێ حازربن کو بشێن مڤایێ ژ ڤان کورانکاریان وەربگرن و ئەزمونا هەرێما کوردستانێ ب پارێزن.

بو قەربوکرنا زیان و نەخوشیێن چار سالێن بوری خەلک چاڤەرێ هندی یە سیاساتێن گشتی لسەر بنەمایەکێ ئەکادیمی بهێن دارێشتن کو گەشەیا ئابوری، سیاسی، چڤاکی و رەوشەنبیری دوبارە بکەفە ل سەر رێ رەوێ خویێ دورست و رولا حزب و رێکخراوێن چڤاکێ مەدنی، زانکو و بنگەهێن ڤەکولینێ ژی زور گرنگە بو پشتەڤانی کرنا سەرکردێن سیاسی بو هندێ بزانن ب چ ئاست و چ ئاوا خزمەتا خەلکی بهێتە کرن.  

لڤێرە خالەک دیا گرنگ هەیە ئەوژی هەبونا مەرجعیەتا سیاسی. بو راوێژ و دارشتنا بریارێن دورست ل دەما دورست دا، گەلەك پێدڤی یە نەخاسمە وەکو مە ل سەری دیارکری ئەم چاڤەرێ گورانکاریێن مەزن دکن لەورا دڤێت مە حازرێن مەزن ل بەر دەست هەبن ژ پلان و رێکخستن و چاڤدیرکرن و هەلسەنگاندن بو هندێ ئەو کوردستانا بهێز مە دڤێت ئەم هەمی ببینن و بەشداربن د ئاڤاکرنا وێدا.

رەمەزان كێڤلی

05.03.2019