پەیوەندی bergeh.com@gmail.com

گرێیا حكومەتا سویدێ ڤەبوو نەخشە ل یا كوردستانێ ژی

گرێیا حكومەتا سویدێ ڤەبوو نەخشە ل یا كوردستانێ ژی

پشتی 131 رۆژ ب سەر ھلبژارتنان را دەرباس بوون، پارتێن سیاسیێن سویدێ كارین ل ھەڤ بكن و حكومەتا سویدێ پێكبینن و سەرۆكوەزیرەك دەستنیشان بكن. رۆژا ئەینیێ 18.01.2019ێ پارلامەنتۆیا سویدێ دەنگ ب ستێفان لۆڤەن سەرۆكێ پارتیا سوسیالدەمۆكراتا دا و ئەو وەكو سەرۆكوەزیر راسپارت كو حكومەتا سویدێ ئاڤا بكە، تێ چاڤەرێكرن كو رۆژا دوشەمێ 21 ڤێ مەھێ ستێفان لۆڤەن پێكھاتەیا كابینەیا خوە پێشكەشی پارلامەنتۆیێ بكە داكو باوەریێ پێ بدن.

ل سویدێ دو بلۆك یان دوو بەرە یێن كلاسیك ھەنە كو د ھەموو ھلبژارتنان دا ل سەر كورسیێن پارلامەنتۆیێ ھەڤركیێ دكن؛ بلۆكا ل ژێر ناڤێ (ئالیانس) کو ژ 4 پارتیان پێک دهێت ئەوژی؛ پارتییا مودێرات، سەنتەر پارتی، پارتیا لیبەرال و پارتییا کریست دیموکرات. هەروەسا بلوکێ دن ژی ل ژێر ناڤێ (کەسك و سور) کو پێك د هێت ژ؛ پارتییا سوسیال دیموکراتان ، پارتییا چەپ و پارتییا ژینگەهێ.

د ڤان سالێن داویێ دا پارتیا رەگەزپەرست یا بناڤێ (سویدیێن دەموکرات) ھاتیە ئاڤا كرن و ھلبژارتن بۆ ھلبژارتنێ رەوشا وێ بەر ب باشیێ دچە و دەنگێن وێ زێدە دبن، د ھلبژارتنا داویێ دا 62 كورسی بدەست خستن و بۆ پارتیا سێیێ ل سویدێ.
هەلبژارتنێن سویدێ ل روژا 2018/9/9 هاتنە ئەنجام دان و بلوکێ (سور ە كەسك) ب ئێك کورسی ژ بلوکێ (ئالیانس) زێدەتردەنگ ئینان و ڤێ یەكێ ژی وەسا كر كو ئاڤاكرنا حكومەتێ گەلەك ب زەحمەت بە و ژبەرھندێ ژی گەلەك گیرۆ بوو.

ژبۆنا كو پارتیا رەگەزپەرست (سویدیێن دەموکرات) نەكەڤ د حكومەتێ دا و ژبۆنا كو وێ چ باندۆر و دەستھلات ل سەر حكومەتێ نەبە، دوو پارتیێن ناڤا بلۆكێ ئالیانسان، پارتیا سەنتەر و پارتیا لیبەرال پشتەڤانیا ستێفان لۆڤەن كر و د دەنگدانێ دا دەنگ ل دژی لۆڤەن نەدا، دەنگێن وان ب دەنگێ زەر ھاتن حساب كرن، ئانكو بێدەنگ. پارتیا چەپ ژی بێدنگ مان و دەنگێن وێ ژی زەر ھاتن ھژمارتن.

دەنگان ب ڤی ئاوایی بوو:
ئەرێ: 116 دەنگ (سوسیالدەمۆكرات و پارتیا ژینگەھ)
نەخێر: 153 دەنگ (موێدرات، كریست دەمۆكرات و سوێدیێن دەموکرات)
دەنگێن زەر: 77 دەنگ (پارتیا سەنتەر، لیبەرال و پارتیا چەپ)

یاسایا سویدێ ب ڤێ ئاوایی یە: پارلامەنتۆیا سویدێ 349 پارلامەنتەرن، دڤیابوو 176 كەسان گۆتبا نەخێر ھینگێ حكومەت ئاڤا ستێفان لوڤەن نەدكاری ببە سەرۆكوەزیر.

ڤێجا بلا پارتیێن باشوورێ كوردستانێ ژی سازانێ (كۆمپرۆمیس) بكەن و بەرژەوەندیێن گەل ب سەر ھەموو بەرژەوەندیان را دانن و لەزێ ل پێكانینا حكومەتێ بكن و دەست ب خزمەتا خەلكێ بكن.

NH