پەیوەندی bergeh.com@gmail.com

بارزانی: گەلێ مە خوە ناچەمینە

بارزانی: گەلێ مە خوە ناچەمینە

سەرۆك مەسعود بارزانی د پەیاما خوە یا ب مناسبەتا 43 سالیا شورەشا گولانا پێشكەفتنخواز دا، وێ شورەشێ ب بوویەرەكا ب روومەت یا مەھا گولانێ  و بەردەوامیا خەبات و تەكۆشینا گەلێ كوردستانێ یا ل دژی بندەستی و داگیركەریێ ب ناڤ دكە.

سەرۆك بارزانی د پەیاما خوە دا دبێژە كو شورەشا گولانێ ب زەلالی ئەو په‌یام ب جیھانێ گەھاند  کو  گەلێ كوردستانێ  ب پیلانگێری، نه‌پاکی، ئاگر و ئاسن ژئناڤ ناچە و كەس نكارە گەلێ كوردستانێ نه‌چار بكە ده‌ست ژ مافێن خوه‌ یێن ڕه‌وا بەردە.

بارزانی دیار دكە كو ئه‌گه‌ر د قۆناغه‌کێ دا ژی خه‌باتا گه‌لێ کوردستانێ توشی ڕاوه‌ستان و شکه‌ستێ هاتبە ژی، لێ گه‌لێ كورد خوه‌ ناچه‌مینە و ب ئیراده‌یه‌کا پۆلایین دژی داگیرکاریێ بەردەوام دبە.

ئەڤ ل ژێر تەكستا پەیاما سەرۆك بارزانی:

ب ناڤێ خوه‌دایێ مه‌زن و دلۆڤان

یه‌ک ژ بیرانینێن ب ڕوومه‌تێن مه‌ها گولانێ، سالڤه‌گه‌را هەلگیرساندنا شۆره‌شا گولانا پێشکه‌تنخوازه‌، شۆره‌شه‌ک كو به‌رده‌وامیا خه‌بات و قوربانیدانا گه‌لێ کوردستانێ بوو ل دژی سته‌م و داگیرکاریێ.

شۆره‌شا گولانێ، قۆناغه‌کا گرینگا به‌رخوه‌دانا پێشمه‌رگه‌ و گه‌لێ کوردستانێ یە و وێ شورەشێ ب ڕوونی ئەو په‌یام ڕاگەهاند کو ب پیلانگێری، نه‌پاکی، ئاگر و ئاسن نکارن ده‌نگێ گه‌لێ مه‌ قوت بکن و مه‌ نه‌چار بکن ده‌ست ژ ئازادیخوازی و مافێن خوه‌ یێن ڕه‌وا بەردن. ئه‌گه‌ر د قۆناغه‌کێ دا ژی خه‌باتا گه‌لێ کوردستانێ توشی ڕاوه‌ستان و شکه‌ستنێ هاتبە ژی، لێ گه‌لێ مه‌ خوه‌ ناچه‌مینە و ب ئیراده‌یه‌کا پۆلایین دژی داگیرکاریێ دا دچە و هه‌تا مافێ ڕه‌وایێن خوه‌ ب دەست بخە دێ د شۆره‌ش و به‌رخوه‌دانێ دا بە.

د چلوسێیه‌مین سالڤه‌گه‌را شۆره‌شا گولانێ دا،  ژ هه‌موو تێکۆشه‌ر،  پێشمه‌رگه‌یێن قه‌هره‌مان و وان نشتیمانپه‌روه‌رێن بنده‌ستی ڕه‌د کرن و  وه‌ستیان  و کۆچبه‌ری هلبژارتن و قوربانیێدان و د کێمترین ده‌م دا ژنووڤە شۆره‌ش هەلگیرسانن سلاڤان دشینم.

هه‌زاران سلاڤ ژ بۆ گیانێ پاکێ شه‌هیدێن شۆره‌شا گولانێ و شه‌هید سه‌ید عەبدوڵا، یه‌که‌م شه‌هیدێ شۆره‌شا گولانێ،  و هه‌موو شه‌هیدێن کوردستانێ به‌. سلاڤ ل خوه‌راگری و ئازایه‌تیا پێشمه‌رگه‌ کو ب خوین و قوربانیدانا خوه‌ سه‌رفەرازی ژ بۆ گه‌لێ خوه‌ پێکانین.

د  ڤێ سالڤه‌گه‌رێ دا،  ئەم جارەكا دن دبێژن  کو ئیراده‌یا گه‌لێ کوردستانێ بهێزه‌ و زێدەباری هه‌بوونا پیلانگێریان، لێ به‌لێ ژ بۆنا پێکانینا مافێن ڕه‌وایێن خوه‌ ب ئیراده‌یه‌کا بلندتر ژ به‌رێ تێدکۆشە  و به‌رده‌وامیێ ب په‌یاما ئاشتی، پێکڤه‌ژیان و پێشکه‌تنخوازیێ دده‌.

مه‌سعود بارزانی

2019.05.25